Спасовски ги посети полицајците кои беа повредени за време на протестите
- Министерот за внатрешни работи Оливер Спасовски денеска во ПЦ „Ѓорче Петров” ги посетил полициските службеници кои беа повредени за време на протестите.
![Спасовски ги посети полицајците кои беа повредени за време на протестите](https://mia.mk/index.php/images/20221113183746_big_730x400_34.webp )
Скопје, 22 јули 2022 (МИА) - Министерот за внатрешни работи Оливер Спасовски денеска во ПЦ „Ѓорче Петров” ги посетил полициските службеници кои беа повредени за време на протестите.
Во свое име и во име на МВР, напиша на фејбук профилот минситерот Спасовски, им оддавам признание за припадниците на македонската полиција за пожртвуваноста, посветеноста и присебноста при обезбедувањето на мирот и стабилноста на граѓаните и на виталните државни институции за време на протестите, а воедно да им посакам брзо закрепнување.
Спасовски потсетува дека беа повредени вкупно 54 полициски службеници, од кои 11 потешко повредени, а двајца со сериозни повреди, а притоа би потсетил, напиша, и на фактот дека за време на протестите од страна на полицијата не беа употребени ни пиротехнички, ниту хемиски средства за разбивање на толпата, а со огромно задоволство можам да кажам дека не е повреден ниту еден граѓанин.
Во обезбедувањето на протестите учествуваа припадници на Одделот за специјални полициски операции - ЕБР, ЕОП, како и полициски службеници од СВР Скопје - на сите припадници кои секојдневно учествуваа во работните задачи и спроведување на мерките, кои беа во првите редови, објави министерот, сакам да оддадам посебно признание, за разумните одлуки, за енергичноста, истрајноста, исклучителната посветеност и професионализмот.
- Уште еднаш сакам да потенцирам дека македонската полиција имаше огромна одговорност, бидејќи протестите кои немаат основа, не се пријавени, односно се базираат на пропаганда, секогаш имаат хибридни методи и креираат своја искривена претстава во јавноста. Токму во таа насока би ја потенцирал и поуката од сето ова - што значи напад врз полициски службеник, не само за време на протести, туку генерално. Нападот врз полицаец е напад врз државата и за тоа свеста мора да биде на највисоко ниво, напиша на фејсбук Спасовски. цр/аа/
![295320367_596066238556986_7101340617451246590_n](/articles/images/%d1%81%d0%bf%d0%b0%d1%81%d0%be%d0%b2%d1%81%d0%ba%d0%b8-%d0%b3%d0%b8-%d/yQtMFAVHk/placeholder.webp?use_watermark=0)
![295438637_596066268556983_8454116753450783338_n](/articles/images/%d1%81%d0%bf%d0%b0%d1%81%d0%be%d0%b2%d1%81%d0%ba%d0%b8-%d0%b3%d0%b8-%d/Y85ht5XDs/placeholder.webp?use_watermark=0)