Смртоносниот срцев удар најчесто се случува во понеделник
- Претпоставките засега говорат дека тоа може да биде поврзано со нарушен сон или стрес од враќањето на работа.
![Смртоносниот срцев удар најчесто се случува во понеделник](https://mia.mk/index.php/images/20230608111040_big_730x400_90.webp )
Лондон, 8 јуни 2023 (МИА) - Ново научно истражување посочува кога обично се случуваат најголемиот број фатални срцеви удари. Овој вид инфаркт е наречен СТЕМИ.
Имено, британската „Бритиш харт фаундејшн“ објави дека СТЕМИ најчесто се случува на почетокот на седмицата, т.е. во понеделник. Претпоставките засега говорат дека тоа може да биде поврзано со стрес или нарушен сон.
- Сега треба да откриеме што точно ги прави срцевите напади поверојатни во одредени денови. Ова може да им помогне на лекарите подобро да ја разберат таа смртоносна состојба за да може да спасиме повеќе животи во иднина, изјави д-р Нилеш Самани.
Според кардиологот Џек Лафан, тоа веројатно се должи на стресот од враќањето на работа.
- Зголемениот стрес доведува до поголемо ниво на кортизол - хормонот на стрес што е поврзан со поголема опасност од срцев удар, посочи тој.
За целите на ова истражување, биле анализирани податоци на 10.528 пациенти ширум Ирска, кои биле примени в болницата меѓу 2013 и 2018 година. си/сд/