Сите 367 патници од авионот на „Џапан Ерлајнс“ се безбедни, петмина загинати во авионот на крајбрежната стража
- Летот 516, на патничкиот авион на “Џапан Ерлајнс“, што сообраќаше од Хокаидо, во северна Јапонија, за Токио, се судри со другиот авион, потоа се запали на пистата и на крајот целосно изгоре. Во авионот имаше 367 патници и 12 членови на екипажот, и сите успееја да го напуштат леталото и безбедно да се евакуираат.
![Сите 367 патници од авионот на „Џапан Ерлајнс“ се безбедни, петмина загинати во авионот на крајбрежната стража](https://mia.mk/index.php/images/20240102130159_big_730x400_94.webp )
Токио, 2 јануари 2024 (МИА) – Безбедно се евакуирани сите 379 патници и членови на екипажот од авионот на „Џапан Ерлајнс“ (Japan Airlines), што се запали при слетувањето на аеродромот Ханеда, во Токио, соопшти пред малку компанијата, пренесе ДПА.
Авионот се судри на пистата со авион на јапонската крајбрежна стража, претходно јавија јапонските медиуми, повикувајќи се на Министерството за транспорт.
Пријавено е дека пет лица од авионот на крајбрежната стража се мртви. Тешко е повреден пилотот на авионот, еден од шестмината во екипажот на леталото на крајбрежната стража.
Летот 516, на патничкиот авион на “Џапан Ерлајнс“, што сообраќаше од Хокаидо, во северна Јапонија, за Токио, се судри со другиот авион, потоа се запали на пистата и на крајот целосно изгоре. Во авионот имаше 367 патници и 12 членови на екипажот, и сите успееја да го напуштат леталото и безбедно да се евакуираат.
Според телевизиската станица ТБС, авионот на крајбрежната стража превезувал материјал за зоната на земјотресот на западниот брег на земјата, каде досега најмалку 48 лица го загубија животот.
На снимки од ТВ станицата ТБС се гледа како патниците од патничкиот авион се евакуираат од леталото преку гумен лизгач за итни случаи, во време кога спасувачките служби од аеродромот изведуваат операциите на гаснење на пожарот.
Сите писти на токискиот аеродом се затворени, соопшти Министерството за транспорт. сд/
фото:МИА архива