Рускиот војник побара прошка од вдовицата на убиениот украински цивил
- Тој вчера се изјасни како „целосно“ виновен за убиството на невооружен, 62-годишен човек
![Рускиот војник побара прошка од вдовицата на убиениот украински цивил](https://mia.mk/index.php/images/20221113135728_big_730x400_88.webp )
Киев, 19 мај 2022 (МИА) - Првиот руски војник, на кого му се суди за воено злосторство во Украина, од почетокот на руската инвазија, денеска побара прошка од вдовицата на убиениот украински цивил, јави Би-би-си.
- Но, разбирам дека нема да можете да ми простите, додаде 21-годишниот Вадим Шишимарин, кој може да добие казна доживотен затвор.
Тој вчера се изјасни како „целосно“ виновен за убиството на невооружен, 62-годишен човек. Судењето во Киев вчера беше прекинато бидејќи во судницата не можеа да се сместат 150 новинари, кои се појавија за да го следат случајот, јави Си-Ен-Ен.
Тројца судии денеска ќе го слушнат сведочењето на Шишимарин, како и тоа на сопругата на жртвата. Двајца сведоци ќе бидат повикани од страна на Обвинителството, вклучувајќи и уште еден руски војник, кој бил во истото возило со обвинетиот, кога тој пукал.
Кремљ во текот на вчерашниот ден соопшти дека нема информации за случајот. бд/ссм/