Мадрид, 9 септември 2020 (МИА) - Фудбалерот на Реал, Герет Бејл може да ја смени средината до крајот на преодниот рок и да се врати во Премиер лигата. Клубот од Мадрид конечно е подготвен да му даде зелено светло за заминување, а Шпанците наводно се подготвени да плаќаат половина од неговата неделна плата од 600.000 фунти. Бејл минатата недела изјави дека Реал „му го отежнал животот“ кога го блокирал неговиот трансфер во Кина пред 12 месеци. Сепак, се чини дека тие сега се подготвени да попуштат и да помогнат да се реализира некаков вид трансфер. Така, тие би ослободиле дел од буџетот за плати, а подготвени се да го продадат за само 25 милиони евра. Островските медиуми го наведуваат Манчестер Јунајтед како еден од заинтересираните клубови. Бејл се врати во таборот на Реал по обврските кон репрезентацијата на Велс, но не можеше да тренира веднаш. Тој наводно полесно го повредил коленото додека настапуваше за националниот тим. Минатата недела тој одигра едно полувреме на мечот со Финска, а потоа го одигра целиот натпревар во неделата против Бугарија.