Распишан конкурсот за Интернационалниот музички фестивал „Охрид фест – Охридски трубадури 2023“
- Интернационалниот музички фестивал „Охрид-фест – Охридски трубадури“ го распиша конкурсот за нови композиции што ќе бидат дел од годинешното јубилејно 30-то по ред фестивалско издание.
![Распишан конкурсот за Интернационалниот музички фестивал „Охрид фест – Охридски трубадури 2023“](https://mia.mk/index.php/images/20230403110220_big_730x400_40.webp )
Охрид, 3 април 2023 (МИА) - Интернационалниот музички фестивал „Охрид-фест – Охридски трубадури“ го распиша конкурсот за нови композиции што ќе бидат дел од годинешното јубилејно 30-то по ред фестивалско издание.
Новите композиции ќе бидат премиерно изведени на Фолк- вечерта предвидена за 1 септември, како и Интернационалната вечер закажана за утредента 2 септември на сцената Долни Сарај во Охрид.
Организаторот на фестивалот соопшти дека и годинава манифестацијата дава голема подршка на дебитантите, охрабрувајќи ги да настапат на 30-то издание на „Охрид фест- Охридски трубадури“.
-Ова е извонредна шанса за промоција на дебитантите, бидејќи Охрид фест го следат повеќе од 15 телевизии од Балканот, се наведува во соопштението на организаторот.
Условите за учество на „Охрид фест – Охридски трубадури 2023“ се доставена демо-снимка со наслов на композицијата и текст на македонски јазик, назнака за која од фестивалските вечери е испратената композиција. Исто така, композициите не смее да се претходно изведувани, демо-снимките да бидат проследени со пратечки инструменти, пијано и гитара и со наведени податоци за авторите.
На конкурсот можат да учествуваат сите домашни и странски автори кои ги исполнуваат условите за учество.
Авторските композиции треба да се испратат на адресите ohridfest.info@gmail.com, ohridfest.produkcija@gmail.com и grigorkoprov@yahoo.com.
Рокот за поднесување на пријавите е 1 јуни 2023 година. аб/ац/