Признанија за повеќекратните крводарители од Кочани по повод Светскиот ден на крводарителството
- Општинската организација на Црвен крст од Кочани денеска организираше свеченост по повод 14 Јуни – Светскиот ден на крводарителството, на која им беа доделени признанија и награди на повеќекр
![Признанија за повеќекратните крводарители од Кочани по повод Светскиот ден на крводарителството](https://mia.mk/index.php/images/20221113155613_big_730x400_79.webp )
Кочани, 14 јуни 2022 (МИА) – Општинската организација на Црвен крст од Кочани денеска организираше свеченост по повод 14 Јуни – Светскиот ден на крводарителството, на која им беа доделени признанија и награди на повеќекратните крводарители од кочанскиот регион.
За рекордер, со 100 крводарувања, беше прогласен Звонко Илиев, а покрај него меѓу најдобрите се вброија уште четворица хумани граѓани за активно учество на 50 крводарителски акции во општина Кочани.
-Со овој настан сакаме да ја истакнеме важноста на крводарителството за спасување човечки животи, а истовремено да им оддадеме почит на хуманите сограѓаник кои покажаа несебичност на досегашните акции што ги организираме. Ова е наша долгогодишна традиција што успешно ја продолжуваме, а ги истакнуваме позитивните примери за пет, десет, дваесет и пет, педесет и сто пати дарувана крв. Упатуваме благодарност и до граѓаните, но и до правни лица и институциите кои несебично ни помагаат во реализацијата на активностите, истакна Анета Коцева, секретарка на општинскиот Црвен крст – Кочани.
Најдобрите крводарители упатија апел до младите да покажат хуманост и да се вклучат во редовните крводарителски акции што ги организира Црвен крст.
-Од пред шест месеци сум во пензија, но тоа нема да ме спречи да продолжам со крводарувањето, ако ме служи здравјето и ако добијам лекарска согласност. Им порачувам на младите да го следат нашиот пример и да помогнат во спасувањето животи, затоа што како долгогодишен возач во Итната медицинска помош во Кочани и самиот видов што значи да му се помогне некому при сообраќајна несреќа или за друг вид потреба од крв, истакна крводарителот рекордер Звонко Илиев.
Признанија за поддршката и помошта при организирањето на крводарителските акции од општинскиот Црвен крст – Кочани им беа доделени и на Службата за трансфузиологија во Општа болница, на Одделението за внатрешни работи и на локалните телевизиски станици. та/сст/