Преку демо тура со електричен автобус, Прилеп се вклучи во европската недела на мобилност
- Со градска линија на електричен автобус во посета на прилепското основно училиште „Климент Охридски“ и со превоз на еден клас од 30 ученици до Паркот на револуцијата и едукативно предавање, П
![Преку демо тура со електричен автобус, Прилеп се вклучи во европската недела на мобилност](https://mia.mk/index.php/images/20221113231111_big_730x400_97.webp )
Прилеп, 27 септември 2022 (МИА) - Со градска линија на електричен автобус во посета на прилепското основно училиште „Климент Охридски“ и со превоз на еден клас од 30 ученици до Паркот на револуцијата и едукативно предавање, Прилеп денеска се вклучи во одбележувањето на Европската недела на мобилност и во поддршката на одржливото размислување и живеење.
Учениците имаа едукативно предавање на тема „Екологија и придонесот на електричните возила кон намалување на загадувањето и заштитата на животната средина“.
За прилепскиот градоначалник Борче Јовчески климатските промени создаваат опасност, но и потреба да се размислува за намалување на опасноста од загадувањето на животната средина и емисијата на издувните штетни гасови.
- Еден од начините е токму употребата на електрични превозни средства, особено нивното користење во јавниот градски превоз. Токму оваа денешна тура со електричниот автобус ни ги покажува можноста и иднината кон која треба да се стремиме за да ги подобриме условите за живот на граѓаните - јавен електричен градски превоз со 0 емисија на штетни гасови, изјави Јовчески.
Билјана Јанчевска од компанијата „Аутомакедонија“ од Скопје, со чија поддршка се одвива одбележувањето, смета дека е многу битно да се имаат предвид предностите на електричната мобилност во секојдневното живеење.
- Се надеваме дека во иднина низ улиците во градовите ќе гледаме повеќе електрични превозни средства, рече Јанчевска.
Инаку, моментално, автобусите во прилепскиот јавен превоз се на метан. ем/цр
![thumbnail_foto mobilnost](/articles/images/%d0%bf%d1%80%d0%b5%d0%ba%d1%83-%d0%b4%d0%b5%d0%bc%d0%be-%d1%82%d1%83%d/E5sTN9UWX/placeholder.webp?use_watermark=0)
![309114356_778611836753953_4666490103835345832_n](/articles/images/%d0%bf%d1%80%d0%b5%d0%ba%d1%83-%d0%b4%d0%b5%d0%bc%d0%be-%d1%82%d1%83%d/XYfQzzFYq/placeholder.webp?use_watermark=0)