Скопје, 21 јули 2022 (МИА) - Министерот за финансии Фатмир Бесими заедно со својот тим денеска на состанок во Министерството дискутираше со претставници на бизнис заедницата за мерките и политиките кои се планирани, како и целите на ребалансот на Буџетот за 2022 година што беше усвоен од Собранието. Говорниците, како што соопшти Министерството за финансии, се согласиле дека оваа криза има големо влијание и секој треба реално да ја согледа и да преземе дел од товарот. - Тоа е трка која не бара спринт, туку решенија кои на долг рок се издржани, се порача на состанокот и затоа мерките треба да бидат таргетирани и насочени кон најпогодените од кризата. Министерството за финансии, како што посочуваат оттаму, е во интензивен процес на креирање и подготовка на мерки за поддршка на граѓаните и стопанството кои ќе се применуваат во втората половина од годината. Процесот се одвива во консултации со меѓународните финансиски институции. - Нашиот пристап во работењето е инклузивност на сите засегнати страни. Ова е период во кој се соочуваме со криза и мора јасно да кажеме дека станува збор за голем екстерен шок на кој мораме да се приспособиме, да одговориме на предизвиците и одговорно да управуваме со јавните финансии, рече Бесими. Министерот ги запознал присутните со целите на Ребалансот на Буџетот, при што акцент бил ставен на поддршката на стопанството и што се презема за во наредниот период да се одговори на предизвиците кои ги носи кризата, преку таргетирани мерки. - Во Ребалансот се предвидени 4,7 милијарди денари или 76 милиони евра за антикризни мерки, кои ќе бидат таргетирани и насочени за поддршка на најпогодените категории граѓани и исто така ќе бидат насочени кон најпогодените претпријатија. Дополнителна поддршка која ќе значи влез на финансиски средства во економијата се предвидениот поголем износ за поддршка на инвестиции, средства кои се достапни за компаниите по поволни услови од кредитните линии од Развојната банка, средства за кои се разговара во моментов со Европската инвестициски банка во износ од 100 милиони евра, но, исто така, и програмите во ТИРЗ, Законот за финансиска поддршка на инвестиции, како и реализацијата на предвидените капитални инвестиции во Буџетот кои се планирани на 520 милиони евра и се на историски највисоко ниво, рече Бесими. Тој додаде дека во насоките по кои се движи Министерството во креирањето политики исклучително е важна соработката со приватниот сектор со кој заедно треба да се одговори на предвизиците од енергетската криза. Претставниците на најголемите стопански комори во земјава, ги поздравиле мерките и политиките што ги презема Владата досега во справување со кризата и упатиле порака дека поддршката на претпријатијата е од особено значење во периодот што следи, бидејќи тие се извор на приход и на граѓаните, кои се вработени во нив, но и на приходите во буџетот. Потенцирале дека фокусот треба да се стави особено на поддршката во делот на електричната енергија, бидејќи, како што кажале, фирмите нема да можат да го издржат долго енергетскиот удар. На состанокот станало збор и за даночната политика, притисокот за раст на платите, а било потенцирано и значењето на ИТ секторот кој, како што наведуваат од Министерството, бележи раст во услови на криза. На состанокот, кој беше инициран од страна на министерот за финансии, присуствувале претставници од Стопанската комора, Стопанска комора на Северо-западна Македонија, МАСИТ и Сојузот на стопански комори, како и директорките на Управата за јавни приходи и Царинската управа и претставници од Кабинетот на премиерот. мс/aa/