Платини се врати на висока позиција во фудбалот
- Во 2016 година, Платини беше осуден на седумгодишна забрана да зазема било каква позиција во фудбалот, откако беше откриено дека добил нерегулирана исплата на два милиони франци од тогашниот
![Платини се врати на висока позиција во фудбалот](https://mia.mk/index.php/images/20221103164022_big_730x400_57.webp )
Хуфдорп, 22 јануари 2020 (МИА) - Поранешниот претседател на УЕФА, Мишел Платини, кој е казнет за коруптивни практики, се врати на високо место во ФИФПро - Светската асоцијација на професионални фудбалери. Французинот ќе биде личен советник на претседателот на организацијата, Филип Пијат.
Во 2016 година, Платини беше осуден на седумгодишна забрана да зазема било каква позиција во фудбалот, откако беше откриено дека добил нерегулирана исплата на два милиони франци од тогашниот претседател на ФИФА, Сеп Блатер. По жалбата, санкцијата на Платини беше намалена и истече минатиот октомври, кога трикратниот добитник на „Златната топка“ изјави дека планира да се врати во фудбалот.
„Со оглед на неговата аура, неговите меѓународни вештини, неговите знаења и позициите што ги има, тој ќе биде важен за нас и неговиот глас ќе се слушне на највисоко ниво. Го познавам уште од 1972 година. Засега, тој ќе ја заземе позицијата како волонтер и нема да има службено работно место. Тој секогаш работел за правата на фудбалерите како претседател на УЕФА“, изјави Пијат.
Платини ја зазема позицијата личен советник на Пијат две години пред изборот на нов претседател на ФИФПро, позиција за која Пијат веќе објави дека нема да се кандидира, што веќе предизвика гласини дека Платини цели на оваа функција.
ФИФПро е Светска асоцијација на професионални фудбалери, во која членуваат приближно 65,000 играчи. Седиштето на организацијата, од кои 63 земји членки се членки, се наоѓа во Хуфдорп, Холандија.