Вашингтон, 8 април 2022 (МИА) - Висок претставник на американското Министерство за одбрана денеска изјави дека САД „имаат индиции дека Русија сака да регрутира повеќе од 60.000 војници“. -Тоа е комбинација од нови регрути и мобилизација на резервисти, а целта е да се зајакнат силите кои ја напаѓаат Украина, додаде функционерот. Тој предупреди дека „допрва треба да видиме“ колку Русија ќе успее да ги достигне овие бројки, но и колку овие сили ќе бидат обучени и каде точно ќе бидат испратени. Официјалниот претставник, исто така, кажа дека САД не забележале дека руските сили добиваат „свежи засилувања, целосно обучени и вооружени“, подготвени да ги заменат потрошените руски баталјони во Украина. -Што се однесува до моменталната способност на руската војска, Русија сега е под 85 отсто од проценетата расположлива борбена моќ што ја имаше пред инвазијата на Украина во февруари, додаде официјалниот претставник. Тој објасни дека оваа проценка вклучува низа фактори како што се бројот на тенкови, борбени авиони, проектили и самите војници. Официјалниот претставник не сакаше да даде проценки за бројот на руски војници загинати досега во нападот врз Украина. САД, исто така, веруваат дека руската војска не ги решила своите логистички проблеми, кажа официјалниот претставник, додавајќи дека тоа значи дека Русите веројатно нема да можат да ги засилат своите сили во источна Украина наскоро. -Не веруваме дека тоа ќе биде брз процес со оглед на бројот на загуби, како во персонал, така и во опрема, рече претставникот на Пентагон. сд/