Скопје, 25 април 2023 (МИА) - Основното јавно обвинителство Битола поведе постапка против едно лице од Ресен за кое постои основано сомнение дека сторило кривично дело – Тешки дела против безбедноста на луѓето и имотот во сообраќајот, известуваат од службата за односи со јавноста на Јавното обвинителство.

Како што информираат од ЈО, осомничениот кој на 23 април, движејќи се својот автомобил марка „Мерцедес“ со ресенски регистарски таблички на магистралниот пат А3 во насока од Битола кон Ресен, не се придржувал кон одредбите за безбедност на сообраќајот на патиштата, односно возилото го управувал со недозволено  количество на алкохол од 0,67 промили алкохол во крвта.

Освен тоа, од ЈО велат дека тој не го држел автомобилот во движење блиску до десниот раб на коловозот. Кога дошол на критичното место, на околу 700 метри од местото викано „Кај чешмите“, со возилото преминал преку надолжната средишна неиспрекината линија на левата коловозна лента, гледано во насока на неговото движење. Во таа коловозна лента во спротивна насока, движејќи се од Ресен кон Битола, наидувало возило „Сеат Ароса“ со ресенски регистарски таблички во кое имало две лица.

- При судар на двете возила оштетената – возач на автомобилот „Сеат Ароса“ се здобила со тешка телесна повреда од која веднаш починала, додека нејзиниот совозач се здобил со телесна повреда, се вели во соопштението на ЈО.

Надлежниот јавен обвинител уште при извршениот увид на лице место има дадено наредба за обдукција на телото на починатата и други наредби потребни за обезбедување на трагите и доказите.

Основното јавно обвинителство Битола до судијата на претходна постапка има доставено предлог за определување мерка куќен притвор за осомниченото лице, поради опасност од бегство, можност да влијае врз сведоците и вештаците и можност да го повтори кривичното дело.​ сх/лв/

Фото: МИА архива