Скопје, 29 април 2025 

Општина Ѓорче Петров доби напредна технолошка опрема за еколошки мониторинг и справување со ризици од природни непогоди, благодарение на проект финансиран од Европската Унија во рамки на ИПА III Програмата за прекугранична соработка (2021–2027).

Проектот се спроведува во партнерство со Општина Хани и Елезит, Министерството за животна средина и просторно планирање на Косово, Меѓународниот институт за развој и истражување „Д-р Југослав Ачкоски“ и Дирекцијата за заштита и спасување на РСМ.

На денешната презентација во Ѓорче Петров, во присуство на градоначалникот на Општина Ѓорче Петров, Александар Стојкоски, заменик-министерката за животна средина Ане Лашкоска, заменик-директорот на Дирекцијата за заштита и спасување Кашмир Салиу и градоначалникот на општина Хани и Елезит од Косово, Мехмет Балажи, беа претставени придобивките од проектот.

Преку овој проект, Општина Ѓорче Петров доби две високо-технолошки камери со сензори за следење фрлање отпад и појава на диви депонии на критични точки, сензор за мерење на водостојот на реката Лепенец со можност за следење во реално време и навремено предупредување при поплави, два дрона за аеронадзор на тешко достапни терени – за побрзи и поефикасни инспекциски активности и специјализиран камион-кипер за олеснета логистика и интервенции на терен од страна на општинските еко-тимови.

-Преку воведување паметни технологии – сензори, дронови и системи за надзор, добиваме нови алатки во борбата против загадувањето и климатските ризици. Ова не се само технички подобрувања, туку конкретни мерки што директно го унапредуваат квалитетот на животот на граѓаните и ја зголемуваат безбедноста на нашата заедница – рече градоначалникот Стојкоски.

Овој проект е јасен пример за успешна соработка меѓу локалната и централната власт, засилена преку поддршка од Европската Унија, насочена кон создавање почиста, побезбедна и поодржлива иднина за сите граѓани.

Општина Ѓорче Петров

________________________________________________________________________________________ 

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.