Приштина, 11 февруари 2020 (МИА) – Средбата на косовскиот премиер Албин Курти, кој престојува во официјална посета на Албанија, со градоначалникот на Тирана Ерион Велиај, на која на гостинот од Косово требаше симболично да му се врачи клучот на албанскиот главен град, е одложена, објави приштинскиот портал „Газета експрес“. Според овој медиум, како што јави дописникот на МИА од Приштина, причина за одлагање на средбата и церемонијата, е претходната тензична средба на Курти со албанскиот хомолог Еди Рама, на која тие двајца изнеле спротивставени ставови во однос на билатералната и регионалната соработка. Имено, на заложбата на Курти за формирање „албански макро-Шенген“, Рама одговори со барањето за поддршка на веќе промовираната инцијатива од Северна Македонија, Албанија и Србија за „балкански мини Шенген“. – Во овој момент имаме тема која треба да ја унапредуваме. Нема договор за албански Шенген без балкански мини-Шенген. Албанскиот макро Шенген е тесно поврзан со регионалниот Шенген бидејќи ние сме определени да продолжи процесот од Берлин, изјави Рама по средбата со Курти. Веста дека средбата со Велиај е одложена ја потврдија и од кабинетот на тиранскиот градоначалник, како и од партијата на Курти, Движењето Самоопределување (ВВ). Според ВВ, причина за одлагање на средбата, за што е постигната обострана согласност, е преоптоварената агенда на Курти, кој во текот на полудневната посета на Тирана имаше средби и со претседателот на државата Илир Мета, собранискиот спикер Грамоз Ручи и опозицискиот лидер Љуљзим Баша. иа/ми/