Лондон, 2 јануари 2025 (МИА) - Електричната енергија во Обединетото Кралство во 2024 година беше најчиста досега, со рекордно ниско учество на фосилни горива и рекордно високо учество на обновливи извори, покажува анализата, пренесува ДПА.

Во изминатата деценија, Обединетото Кралство повеќе од двојно го зголеми учеството на обновливите извори на енергија и го преполови учеството на фосилните горива, соопшти климатскиот и енергетскиот портал „Carbon Brief.“

Најновата годишна проценка покажува дека емисиите на јаглероден диоксид за секоја единица електрична енергија паднале на 124 грама по киловат-час, што е намалување за повеќе од две третини во споредба со 419 грама во 2014 година, како резултат на помалата зависност од фосилни горива.

Фосилните горива генерирале само 29 отсто од електричната енергија во 2024 година, по ставањето крај на употребата на јаглен со затворањето на последната централа на јаглен во Ратклиф-он-Сор, Нотингемшир.

Обновливите извори, како ветер, сонце и биомаса, генерирале рекордни 45 проценти од електричната енергија.

Вкупно, рекордни 58 отсто од енергијата доаѓала од чисти извори (обновливи и нуклеарна енергија), додека увозот на енергија исто така достигнал рекордни вредности.

Иако ветерот генерира повеќе енергија од гас во 2024 година според Националниот енергетски систем (Neso), анализата покажува дека гасот сè уште е најголемиот поединечен извор на електрична енергија, со 28 проценти од вкупното производство, споредено со 26 отсто од ветерот.

Сепак, зголеменото производство на ветерна енергија сугерира дека во 2025 година ветерот ќе го надмине гасот како најголем извор на енергија.

Анализата покажува и дека со чистењето на енергетската мрежа се зголемуваат придобивките од електричните автомобили и топлинските пумпи.

Возење електричен автомобил наместо бензински сега ги намалува емисиите на јаглерод за 70 проценти, додека загревање на дом со топлинска пумпа наместо гасен котел ги намалува емисиите за 84 отсто.

„Carbon Brief“ користеше податоци од британското Министерство за енергетска безбедност и одржливост и Националниот енергетски систем за оваа анализа. ссм/

фото: архива/илустрација