Нови болиди од 2026 во Формула 1
- Меѓународната автомобилска федерација (ФИА) објави синоќа дека почнувајќи од 2026 година болидите во Формула 1 ќе бидат помали, поагилни и поеколошки.
![Нови болиди од 2026 во Формула 1](https://mia.mk/index.php/images/20240607085512_big_730x400_3.webp )
Лондон, 7 јуни 2024 (МИА) – Меѓународната автомобилска федерација (ФИА) објави синоќа дека почнувајќи од 2026 година болидите во Формула 1 ќе бидат помали, поагилни и поеколошки.
Според новите правила кои стапуваат во сила од сезоната 2026, болидите ќе бидат полесни за 30 килограми од денешните, 10 сантиметри потесни и ќе имаат мотори со речиси 50-50 поделба помеѓу електричната енергија и моќноста на внатрешно согорување.
Воедно, новите болиди ќе користат целосно одржливи горива, пренесува Би-Би-Си.
Новите хибридни мотори, кои тројно ја зголемуваат количината на електрична енергија, привлекоа два нови производители во Формула 1 – Ауди и Форд, и ја убедија Хонда да ја промени својата одлука да го напушти натпреварувањето.
Заедно со Мерцедес, Ферари и Рено, како и новата компанија Ред Бул Павертрејнс, во 2026 година ќе има шест производители на мотори во Ф1. ег ФОТО: Фејсбук