Нови бодови за Рико Вуков во „Порше Карера купот“
- Со двете трки на патеката „Валелунга“, натпреварувањето „Порше Карера куп Италија“ влезе во својата втора половина од сезоната. Македонскиот возач Ристо Вуков освои нови бодови во својата кам
![Нови бодови за Рико Вуков во „Порше Карера купот“](https://mia.mk/index.php/images/20221108165145_big_730x400_23.webp )
Рим, 21 август 2021 (МИА) - Со двете трки на патеката „Валелунга“, натпреварувањето „Порше Карера куп Италија“ влезе во својата втора половина од сезоната. Македонскиот возач Ристо Вуков освои нови бодови во својата кампања, која беше повлијаена од дефект на сопирачките на почетокот од гран при викендот.
- На слободните тренинзи во петокот извозев време 1:36.631 што ми даде пласман на 14 позиција, но распоредот на силите беше таков што првите седум беа во половина секунда, додека втора група од 10 возачи беше во една секунда. Од старт беше јасно дека ќе одлучуваат десеттинки и дека и најмало задоцнување може да биде казнето. Во квалификациите повторно бев на 14. место. Верував дека можам подобро, бидејќи патеката е куса и лесна за учење. Тоа се покажа на стартот од првата трка кога за само еден круг дојдов до 9 место. Но, тогаш почнаа проблемите со сопирачките, па во средишницата бев престигнат од три возила, но на крајот завршив на 12. место.
Екипата „GDL Racing“ се обиде да го отстрани проблемот, но македонскиот пилот открива дека тоа било една непроспиена ноќ на автодромот кој е лоциран 40 километри северно од Рим.
- Едноставно, перформансите при сопирањето не беа на потребното ниво, а немаше видлив дефект. Поради тоа, ги променивме сите делови од системот за сопирање, од шепи и плочки, до дискови и АБС уред. Дополнително, утврдивме дека сме меѓу најбавните според крајната брзина, бидејќи на најдолгиот правец имаме брзина од 230 километри на час, додека конкурентите таму имаа под 240 км/ч. Почувствував дека возилото е подобро од претходно, и повторно успеав да стартувам добро и да се пробијам неколку позиции напред. Сепак, трката беше обележана од трите инциденти кои доведоа до прекини и излегувањето на возилото за безбедност, поради што немаше многу простор за трка. При последното излетување на Лука Мончини беше објавено дека и јас сум под истрага на стјуардите, но веднаш по крајот на трката бев ослободен од секоја одговорност. Моето најбрзо време во првата трка беше 1:36.570 или 1,2 секунди побавно од најбрзите, додека во втората трка имам 1:36.403 и сум само половина секунда побавен од водечките. Искрено, сметав дека во првата сезона сум научил многу, но од денешен аспект знам дека и овие нови искуства ме прават подобар од претходно и уште поцврст за да ја дочекам и зграбам мојата шанса за висок пласман. Лани имавме десет автомобили помалку, но годинава освојувам поени во секој настап, иако мојата желба се подиуми и победи, изјави Вуков.
Со вкупно 43 бода Вуков се наоѓа на 14. место во генералниот пласман. До крајот на сезоната има уште два Гран при викенда, во првиот и последниот викенд од октомври, на патеките Франчакорта и Монца. зс/
![](/articles/images/%d0%bd%d0%be%d0%b2%d0%b8-%d0%b1%d0%be%d0%b4%d0%be%d0%b2%d0%b8-%d0%b7%d/uShjpk9mJ/placeholder.webp?use_watermark=0)