Софија, 18 јуни 2022 (МИА) - Лидерката на Бугарската социјалистичка партија (БСП) и вицепремиер во бугарската Влада отворено го критикуваше претседателот на Бугарија, Румен Радев, повикувајќи го да престане да шпекулира во врска со темата Северна Македонија. Според неа, Радев го користи патриотизмот на Бугарите за личен рејтинг. - Господине претседател, да се користи патриотизмот на Бугарите за личен рејтинг е подло, напиша Нинова на „Фејсбук“. Нинова е децидна дека Владата нема да го укине ветото и дека единствено тело што може да одлучува за ова е Народното собрание на Бугарија. Таа го потсетува претседателот Радев дека Народното собрание е највисок орган во парламентарната република, затоа што во него се е јавно и транспарентно, и затоа што таму се и власта и опозицијата и никој не може да манипулира со нив. -Советодавниот совет за национална безбедност на претседателот дава само консултации, додека одлуките на Народното собрание имаат сила на закон и се обврзувачки, а кој ќе ги прекрши одговара, децидна е Нинова. „Ако следната недела му кажеме на Европскиот совет - Не, ќе излезете ли да се извините што лажете?“, напиша Нинова на Фејсбук, обраќајќи му се на бугарскиот претседател. Дописникот на МИА од Софија потсетува дека Румен Радев двапати бил кандидат на Бугарската социјалистичка партија за претседател на Бугарија во 2016 и 2021 година, а негова кандидатура ја поднела лидерката на оваа партија Корнелија Нинова. нк/