Маврово, 5.август 2025 (МИА) - Двајцата повредни играчи во составот на Алкалоид Никола Костески и Марко Митев заеднички ја минуваат оваа фаза од подготовките. Тие полека фаќаат ритам и заедно работат со физиотерапевтот Тоше Трајковски, а низ рехабилитацискиот процес минуваат и со возење велосипед.

- Се подготвуваме во оваа фаза со физиотерапевт, тој го води рехабилитацискиот процес за враќање на мускулот. Се чувствувам добро и се надевам дека ќе биде се како што треба. Тренираме заедно со Марко Митев за да ја вратиме формата, под специјална програма и со велосипеди, изјави Никола Костески. 

Тој за првпат во својата долга кариера ќе настапува во ист клуб со братот Ненад.

- Прекрасно е да се игра заедно и пресреќен сум, како постар тука сум да го советувам за се што треба, со цел да имаме подобар квалитет и да стигнеме до целта и да се креваме како играчи и тим. Бев со него заедно во репрезентацијата во еден момент, а сега првпат сме заедно во клуб. Имаме квалитетен ростер ова година, а пред нас е тешка и долга сезона, истакна Костески.

Искусниот крилен играч (32 години) ја потецира важноста за добри подготовки особено што екипата ја очекуваат исклучително напорни натпревари на стартот во сезоната во евронатпреварите, но и во домашното првенство.    мн/

Фото: РК Алкалоид