Струмица, 18 март 2024 (МИА) - На „Чист понеделник“, кој се одбележува во рамките на карневалските празнувања во Струмица, со делење и консумирање бел грав беше означен почетокот на Велигденскиот пост.

Според градоначалникот на Струмица, Костадин Костадинов, струмичани се верни на традицијата, а на сите коишто постат им посака со лесно да го поминат овој најголем пост за христијаните.

-Упатувам неколку пораки бидејќи се наоѓаме во динамично и време на големи предизвици.Фактот што имаме двојни избори само по себе значи предизвик, а и тоа што тие се случуваат во најголемиот христијански пост, треба да ни даде до знаење дека мора да внимаваме оти постот сам по себе не е само физичко постење на организмот, туку мораме и духовно да постиме и да постиме со мислите. Барем во овие денови да има што е можно помалку омраза, клеветење, негативни кампањи и вести, оти тоа најмалку ни е потребно на сите. Немаат никаков бенефит граѓаните од препукувањето помеѓу партиите, туку да имаме една достоинствена кампања и барем во Струмица да го имаме она на што повикуваме, да се почитуваме едни со други, а се знае програмски нашите копја нека се преклопуваат и таму е местото и фронтот за борба, порача Костадинов.

Пред делењето гравот беше благословен од свештеници од Струмичката епархија. Оваа традиција има долги корени во Струмица и низ чаршијата и во домовите на струмичани се подготвува бел посен грав. рт/дма/

Фото: МИА