Скопје, 24 октомври 2024 (МИА) - Во просториите на „Мала станица“ денеска со почеток во 19 часот ќе биде отворена изложбата „Тука, но некаде другаде“ во (ко)продукција на непрофитната организација за промоција на женската активност - Тиииит! Инк. (Скопје) и Галерија ШКУЦ (Љубљана).

Групната изложба „Тука, но некаде другаде“, ги истражува универзалните човечки искуства на мобилност, движење и припадност преку лични приказни. Прикажува дела на седум уметници чии практики комбинираат локални и регионални перспективи.

Делата на Невена Алексовски, Елена Чемерска и Ивана Мирчевска, Ана Чворовиќ, Андреа Кнезовиќ, Илија Прокопиев и Ленка Ѓоројевиќ ги вткајуваат заедно динамиката на раселеноста, транснационалните идентитети, колективноста и променливото чувство на припадност на оние кои ги минуваат границите.

Кураторка на изложбата е Јана Старделова.

Изложбата „Тука, но некаде другаде“ ќе биде отворена за посета до 4 ноември 2024 година.ар/са/

Фото: Тиииит! Инк.