Промоција на „Дни, години“ од Димитар Башевски во Градската библиотека
- Најдобрата поетска книга за 2023 година, според Струшките вечери на поезијата, „Дни, години“ од Димитар Башевски, ќе биде промовирана денеска во Градската библиотека „Браќа Миладиновци“ – Скопје, со почеток во 12 часот.
![Промоција на „Дни, години“ од Димитар Башевски во Градската библиотека](https://mia.mk/index.php/images/20240520171813_big_730x400_80.webp )
Скопје, 21 мај 2024 (МИА) – Најдобрата поетска книга за 2023 година, според Струшките вечери на поезијата, „Дни, години“ од Димитар Башевски, ќе биде промовирана денеска во Градската библиотека „Браќа Миладиновци“ – Скопје, со почеток во 12 часот.
На промоцијата во спомен-собата „Т’га за југ“ за „Дни, години“ ќе говори Иван Додовски, а стихови ќе интерпретира актерот Андреј Серафимовски.
Според жирито за минатогодишната награда „Браќа Миладиновци“ на СВП: „Дни, години“ претставува значаен прилог во новите текови на современата македонска поезија. Станува збор за книга со длабоки животни промислувања кажани преку наизглед едноставен поетски јазик. Димитар Башевски сведочи дека неговите поетски вертикали, чии корени се во минатиот век, и натаму се одликуваат со творечка виталност, со жив и сочен поетски говор и со сугестивен и актуелен тематско поетски простор. Притоа тој мајсторски се потпира на досега стекнатото творечко искуство – подвлече комисијата.
„Дни, години“ од Димитар Башевски е во издание на Слово.
Градската библиотека во Скопје со децении традиционално го претставува добитникот на престижната награда за најдобро домашна поетска книга меѓу две изданија на СВП. ир/са/
Фото: ГБСК