Лондон, 27 март 2025 (МИА) – Навивачите на Челзи побараа од Премиер лигата да ја истражи поврзаноста на косопственикот на лондонскиот клуб Тод Боли со веб-страница за препродажба на билети која нуди влезници по цена повисока за илјадници долари од номиналната вредност.

Боли е наведен како член на Управниот одбор на „Вивид Ситс“ (Vivid Seast“, означен од Премиер лигата како „неовластен веб-сајт за издавање билети“ при чие користење навивачите се предупредени да бидат крајно претпазливи.

Здружението на навивачи на Челзи испрати писмо до извршниот директор на Премиер лигата, Ричард Мастерс, во кое се наведува дека „време е да се дејствува и да се истражи“.

„Вивид Ситс продолжува да ги наведува билетите од Премиер лигата над номиналната вредност по значително надуени цени, а нашите членови продолжија да укажуваат дека односот на Боли со Вивид Ситс е нарушување на довербата и јасен конфликт на интереси“, се вели во писмото.

Американскиот милијардер Боли го купи Челзи за 2,5 милијарди долари во 2022 година со конзорциумот „Клирејк Капитал“ (Clearlake Capital).

Вивид Ситс продава билети за различни настани, вклучувајќи ги натпреварите на Челзи во Премиер лигата и Конференциската лига, како и за претстојното Светско клупско првенство во САД.

Билет за претстојниот натпревар против Ипсвич се продава за 990 фунти, а за натпреварот против Ливерпул на 3 мај за повеќе од 3.000 фунти.

На веб-страницата на Челзи, најскапиот билет за возрасни за најбараната категорија изнесува 80 фунти. ег

ФОТО: ЕПА