Белград, 25 јули 2025 (МИА) - Српскиот премиер, Ѓуро Мацут, изрази надеж дека Србија ќе го продолжи својот европски пат до есен, за кој вели дека е „запрен во 2021 година“, нагласувајќи дека верува оти постои „систематско закочување“ на пристапувањето на држа вата кон Европската унија.

По одбележувањето на 100 дена од работата на владата, Мацут изјави  дека не е премногу оптимист дека европската интеграција може да се забрза, наведувајќи дека постојат „голем број ограничувачки фактори и дополнителни услови, кои дефинитивно доаѓаат од Европа“.

Тој додаде дека како личност која е премиер само три месеци, целосно го дели мислењето што го имал и пред да ја преземе функцијата - „дека имаме систематска пречка за пристапувањето на Србија кон Европската унија“.

„Во сите разговори што ги имав со претставниците на ЕУ и со амбасадорите кои се акредитирани во Србија, реков дека не разбирам зошто се воведуваат такви ограничувања, поради што се ограничува слободната волја на земјата и желбата за што поскоро приклучување кон ЕУ“, рече Мацут за РТС.

Тој изјави дека одредени земји во регионот биле примени одеднаш од одредени „целосно јасни политички причини“, додека Србија „се наметнува од други сосема јасни политички причини“.

„Мислам дека ова не е фер однос и дека ЕУ би морала да ја разбере реалноста на моментот и да ги прифати земјите од Западен Балкан како пакет, како што направи со земјите од Источен Балкан“, рече премиерот.

Тој додаде дека се надева дека Србија конечно ќе го продолжи својот европски пат до есен, кога очекува отворање на нови кластери и поглавја во преговорите за пристапување.

„Мислевме дека можеби побрзо ќе стигнеме до отворањето на Кластер 3, можеби веќе во јули оваа година, но со оглед на големата сложеност на медиумските закони што беа усвоени, некако го изгубивме ритамот, но се надевам дека во текот на есента ќе отвориме нови кластери, нови поглавја и дека на овој начин ќе ја продолжиме динамиката на приклучување кон ЕУ“, рече Мацут. зш/