Сеул, 15 април 2026 (МИА) - Генералниот директор на Меѓународната агенција за атомска енергија (МААЕ), Рафаел Гроси, денеска изјави дека секој можен договор меѓу САД и Иран за прекин на конфликтот мора да вклучува „многу детални“ и строги мерки за верификација на нуклеарната програма на Иран.

Гроси во Сеул изјави дека секој потенцијален договор меѓу САД и Иран за прекин на војната на Блискиот Исток бара силен и детален систем за контрола врз нуклеарните активности на Иран.

Тој нагласи дека присуството на инспектори на МААЕ и прецизните механизми за верификација би биле клучни услови, предупредувајќи дека без нив „нема да има договор, туку само илузија за договор“.

Гроси рече дека Иран има „многу амбициозна и обемна нуклеарна програма“ и дека сите негови активности мора да бидат под постојан надзор.

Според него, моменталната ситуација и преговорите меѓу САД и Иран остануваат неизвесни.

Американскиот претседател Доналд Трамп претходно изјави дека наскоро би можела да се одржи нова рунда разговори, додека Вашингтон инсистира дека спречувањето на Иран да добие нуклеарно оружје е клучна цел.

Иран, од друга страна, вели дека неговата нуклеарна програма е исклучиво мирна, но ги отфрла сите ограничувања наметнати однадвор.

МААЕ во претходните извештаи изјави дека Иран има значителни залихи на ураниум збогатен до 60 проценти чистота, што технички е блиску до нивото потребно за нуклеарно оружје, и дека немал целосен пристап до инспекции во одредени области.

Агенцијата предупреди дека доколку Иран одлучи да продолжи во оваа насока, постои потенцијал за изградба на повеќе нуклеарни боеви глави.

Гроси заклучи дека високо збогатениот нуклеарен материјал ќе мора да биде под редовна и строга меѓународна контрола, во согласност со стандардите на МААЕ. мс/јт/

фото: Архива