МААЕ: Зголемувањето на збогатувањето на ураниум од страна на Иран предизвикува загриженост
- Залихата на ураниум со речиси оружен степен на збогатеност се зголеми за околу 23 килограми на нешто под 165 килограми меѓу мај и август, се цитира шефот на МААЕ, Рафаел Гроси, во извештајот објавен денеска.
![МААЕ: Зголемувањето на збогатувањето на ураниум од страна на Иран предизвикува загриженост](https://mia.mk/index.php/images/20240829204110_big_730x400_94.webp )
Виена, 29 август 2024 (МИА) - Меѓународната агенција за атомска енергија (МААЕ) изразува „сѐ поголема загриженост“ поради иранската нуклеарна програма, поради континуираното зголемување на количината на високо збогатен ураниум.
Залихата на ураниум со речиси оружен степен на збогатеност се зголеми за околу 23 килограми на нешто под 165 килограми меѓу мај и август, се цитира шефот на МААЕ, Рафаел Гроси, во извештајот објавен денеска.
Според експертите, околу 50 килограми ураниум збогатен до 60 отсто би биле потребни за нуклеарна боева глава. За користење во нуклеарно оружје, тој би требало да биде збогатен до ниво од 90 отсто.
Иран официјално инсистира дека не цели кон нуклеарен арсенал. Сепак, Гроси истакна дека освен државите кои поседуваат нуклеарно оружје, ниту една друга држава, освен Иран, не произведува толку високо збогатен ураниум.
Според извештајот, кој не е јавно објавен, а во кој имала увид агенцијата ДПА, Иран во последните месеци пуштил во работа многубројни дополнителни центрифуги за збогатување на ураниум на две локации.
Гроси исто така извести дека Техеран сѐ уште не преговара со виенската нуклеарна агенција за отворените прашања во врска со минатите тајни нуклеарни активности.
Откако на почетокот на јули беше избран новиот ирански претседател Масуд Пезешкиан, нема нови преговори, извести Гроси.
Техеран, исто така, се придржува кон својата одлука да не дозволи влез на искусни инспектори на МААЕ во земјата.
Иран се обврза да го ограничи своето нуклеарно оружје во договорот од 2015 година. За возврат, западните санкции требаше да бидат укинати.
Сепак, тогашниот американски претседател Доналд Трамп се повлече од договорот во 2018 година. За возврат, Иран ги рестартираше своите нуклеарни капацитети и драстично ги ограничи инспекциите на МААЕ.ссм/
фото: архива