Скопје, 6 март 2024 (МИА) - Илјадници свеќи ќе ја осветлат сцената на Филхармонијата на премиерното издание на првиот „Candlelight“ - концерт под свеќи на камерниот оркестар Профундис, на кој како солист ќе настапи светски познатиот виолинист Марио Хосен, што ќе се одржи на 12 април.

Хосен, чија виртуозност  му носи признание на престижните сцени ширум светот и „Профундис“, под диригентската палка на маестра Ѓурѓица Дашиќ, ќе ѝ претстават на публиката музичко патување низ делата на реномираните композитори како Вивалди, Паганини, Холст и Глас.

-Продолжуваме со идејата дека камерниот оркестар „Профундис“ ќе биде иновативен, креативен и модерен. Овој пат со концерт под свеќи којшто во моментот е вистинска атракција во 173 града ширум светот, а премиерно со овој концерт списокот се проширува и со Скопје. На наше големо задоволство како солист ќе настапи светски познатиот виолинист Марио Хосен, кој ќе ги изведе четирите годишни времиња од Антонио Вивалди, како и виртуозното дело од Никола Паганини – „I Palpiti“ кое многу ретко се изведува поради специфичната техничка виртуозност и спаѓа во топ 10 најтешки дела за изведба на виолина. Дополнително на концертот ќе има и праизведба на дело од Филип Глас. Овој концерт е повеќе од обична изведба - тоа е извонредно искуство на уникатноста на нашите сетила и универзалниот јазик на музиката, изјави маестра Дашиќ.

Марио Хосен, настапува на престижните сцени ширум светот заедно со врвните оркестри, вклучувајќи ги Лондонската филхармонија, Виенскиот симфониски оркестар и други. Со голема страст за светското музичко наследство, стручноста на Марио се фокусира на Паганини, правејќи го како еден од најистакнатите толкувачи и авторитети за изведување на музиката на овој композитор.

Концептот „Candlelight“, односно концерт под свеќи е светски познат тренд кој првпат ќе биде поставен на сцена пред домашната публика. Музичките критичари го опишуваат како уникатно искуство каде традиционалниот концертен амбиент се трансформира во хипнотизирачка музичка симбиоза облеана во топлиот сјај на свеќите. Интимниот амбиент овозможува подлабока врска помеѓу публиката и изведувачите, создавајќи извонредно концертно искуство, наведуваат организаторите. вг/лв/

Фото: Профундис

.