Комедијата „Обвинителка" вечер во Националната опера и балет
- Комедијата „Обвинителка“ во изведба на Театар „Хит“ вечер ќе биде изведена на сцената на Националната опера и балет.
![Комедијата „Обвинителка](https://mia.mk/index.php/images/20230921193334_big_730x400_89.webp )
Скопје, 22 септември 2023 (МИА) - Комедијата „Обвинителка“ во изведба на Театар „Хит“ вечер ќе биде изведена на сцената на Националната опера и балет.
Како што соопшти Театар „Хит“, се работи за комедија без вулгарности, комедија на ситуации со јасно изразени карактери и комедија која третира актуелна тематика.
Автор на текстот е Огнен Неделковски, режисер - Сашо Ристовски, сценограф е Крсто Богојевски, костимографија - Елена Лука и музиката е на Мишел Трајковски.
Улогите ги толкуваат: Лидија Вукиќевиќ (Србија), Магдалена Ризова-Черних, Сашо Ристовски и Бранко Атанасов.
По барање на публиката, комедијата „Обвинителка“ ќе гостува во Кочани, Кичево, Гостивар, Неготино, Велес и Струмица, а следниот месец се предвидени гостувања и во дијаспората.
Претставата „Обвинителка“ е подржана од Министерство за култура, почесен конзулат на Република Србија со седиште во Охрид, Центар за култура - Штип, НУ Музеј на македонската борба, компанијата „Елена Лука“, Тикен Холдинг и Националната опера и балет. мд/аа/