Њујорк, 20 февруари 2026 (МИА) - Иран вчера предупреди дека ќе одговори „решително и пропорционално“ доколку биде нападнат поради зголемените тензии со Вашингтон велејќи дека американските воени средства во регионот ќе се сметаат за легитимни цели.

Во писмо до генералниот секретар на ОН, Антонио Гутереш, амбасадорот на Иран во Обединетите нации рече дека „сите бази, објекти и средства на непријателската сила во регионот ќе претставуваат легитимни цели“ во случај на агресија.

Американската војска одржува многубројни бази на Блискиот Исток со десетици илјади војници.

Амбасадорот на Иран рече дека Техеран „ниту бара тензии ниту војна и нема да почне никаква војна“ нагласувајќи ја подготвеноста на Техеран да продолжи да работи кон дипломатско решение. Во спорот во врска со нуклеарната програма на Иран амбасадорот рече во писмото - „трајно и балансирано решение“ останува достижно.

Претходно вчера, американскиот претседател Доналд Трамп се чини дека постави рок за договор со Техеран велејќи дека 10-15 дена би требало да бидат доволни и опишувајќи ја временската рамка како „максимална“. Тој предупреди: „Или ќе постигнеме договор или ќе биде несреќно за нив“.

Трамп рече дека светот, веројатно, ќе знае во следните 10 дена во која насока ќе се движат односите меѓу Вашингтон и Техеран.

Разговорите се фокусираат на спорната нуклеарна програма на Иран. Вашингтон има цел да ја спречи Исламската Република да добие нуклеарно оружје.

Техеран сигнализира подготвеност да ги ограничи своите нуклеарни активности во замена за укинување на строгите економски санкции, но досега ги отфрли преговорите за други прашања, вклучително и ограничувањата на неговата ракетна програма. Иран вели дека неговата нуклеарна работа е само за цивилни цели. мс/сд/

фото: Архива