Бејрут, 17 ноември 2024 (МИА) - Израелски борбени авиони повторно погодија цели во Бејрут, вклучително и станбена област на само неколку километри од центарот на градот, јави ДПА.

Црковните ѕвона ѕвонеа во христијанскиот кварт како предупредување за нападите, што ги натера жителите да побараат засолниште во блиските цркви. На Либан, за разлика од Израел, му недостасуваат и засолништа за воздушни напади и официјален систем за предупредување.

Очевидци пријавија силни експлозии, проследени со облаци од густ црн чад што се издигнаа над куќите во областа, а мирисот на чад се прошири во околните населби.

Нема првични извештаи за смрт или повредени.

Израел е вклучен во војна не само во Појасот Газа со палестинската група Хамас, туку и со милицијата Хезболах, сојузник на Иран, во Либан.

Хезболах соопшти дека го напаѓа Израел како поддршка на Хамас кој изврши масакр во Израел на 7 октомври минатата година, што резултираше со 1.200 смртни случаи.

Израел одговори со воздушни напади и копнена офанзива во крајбрежниот појас додека се обидува да го елиминира Хамас. Повеќе од 43.000 луѓе се убиени досега, според здравствените власти управувани од Хамас.

Од септември, израелската војска масовно ги прошири своите напади во Либан, каде што вели дека се обидува да го потисне Хезболах од неговата северна граница за жителите да можат да се вратат во своите домови.

Борбени авиони бомбардираа цели низ целата земја и често во предградијата јужно од Бејрут. Според либанското Министерство за здравство, досега во Либан се убиени повеќе од 3.000 луѓе. мс/

фото: ЕПА