Киев, 12 септември 2024 (МИА) – Претседателот на Украина, Володимир Зеленски изјави дека Русија почна контраофанзива во Курската област за да ги протера украинските сили кои упаднаа во рускиот регион пред пет недели.

Руското Министерство за одбрана соопшти дека нивните сили повторно зазеле 10 населени места во Курск, но борбите не ги опишаа како контраофанзива.

Зеленски тврди дека украинските сили ги предвиделе руските потези и оти се подготвени да се борат.

Украина го започна својот упад во Курската област на 6 август, делумно со надеж дека Русија ќе ги пренасочи своите трупи од Доњецк во источна Украина, каде рускиот воен притисок се заканува да го совлада појасот на клучните одбранбени упоришта.

Слабиот одговор на Москва сугерираше дека Русија не планирала таков развој на настаните и дека била изненадена.

Сепак, руската армија длабоко пробива во источна Украина, особено во Доњецк, и ја напаѓа украинската територија со постојани ракетни и беспилотни напади.

Покровск е едно од главните одбранбени упоришта на Украина и клучен логистички центар во регионот на Доњецк. Неговото заземање би ги загрозило одбранбените способности и рутите за снабдување на Украина и ќе ја приближи Русија до нејзината наведена цел да го заземе целиот регион Доњецк, кој веќе делумно е под нејзина контрола. ми/

фото: ЕПА