Зафатени 100 хектари со борова и дабова шума во пожар на Осоговските Планини во атарот на кочанското село Пресека
- Нов шумски пожар избувна на падините на Осоговските Планини, во атарот на кочанското село Пресека. Во гаснењето се вклучени Територијалните противпожарни единици од Кочани и Македонска Каменица, како и службите од Шумското стопанство „Осогово“ и доброволците од ДПД – Кочани.
![Зафатени 100 хектари со борова и дабова шума во пожар на Осоговските Планини во атарот на кочанското село Пресека](https://mia.mk/index.php/images/20240813160337_big_730x400_49.webp )
Кочани, 13 август 2024 (МИА) – Нов шумски пожар избувна на падините на Осоговските Планини, во атарот на кочанското село Пресека. Во гаснењето се вклучени Територијалните противпожарни единици од Кочани и Македонска Каменица, како и службите од Шумското стопанство „Осогово“ и доброволците од ДПД – Кочани.
-Дејствуваме со триесетина луѓе повеќе од 15 часа на тежок, непристапен терен каде гори високостеблеста борова и дабова шума и ниска вегетација. На површина од 100 хектари пламените јазици достигнуваат и до 20 метри, а веќе се изгорени квалитетни борови стебла. Обид за локализирање на пожарот имаше и од воздух, со поддршка на хеликоптери што се под надлежност на Центарот за управување со кризи. Засега гасењето е неуспешно, истакна Сашо Мијалов, заменик командир на ТППЕ – Кочани.
Според информациите од пожарникарите кои се наоѓаат кај селото Пресека, од пожарот е загрозена и викендичка во која престојувале луѓе.
Од ТППЕ – Кочани нагласија дека борбата со огнената стихија ќе биде тешка, а противпожарните единици на терен ќе останат и во текот на ноќта. та/вј/
Фото: МИА