Засадени околу 320 дрвца на граничните премини
- Во пресрет на Денот на Царината - 14 април, по повод 32 годишнината на Царинската управа, царинските службеници засадија околу 320 млади дрвца на гранични премини, покрај испоставите во внатрешноста и во дворот на Управата.
![Засадени околу 320 дрвца на граничните премини](https://mia.mk/index.php/images/20240413125507_big_730x400_85.webp )
Скопје, 13 април 2024 (МИА) - Во пресрет на Денот на Царината - 14 Aприл, по повод 32-годишнината на Царинската управа, царинските службеници засадија околу 320 млади дрвца на гранични премини, покрај испоставите во внатрешноста и во дворот на Управата.
Како што информираат од Царинската управа, директорот Стефан Богоев посочил дека со ваквата акција се придонесува за заштита на животната средина и позитивни промени за идните генерации.
-Акцијата за засадување дрвца беше организирана во текот на изминатата работна недела на територија на целата држава и притоа беа опфатени над десет локации во околината на граничните премини и царинските испостави во државата, како и во седиштето на Царинската управа, на кои симболично беа засадени по 32 садници. Во акцијата беа вклучени царинските службеници од сите царинарници и од Управата, а при засадувањето на дрвцата на граничните премини се вклучија и колегите од соседните земји, се наведува во соопштението. свс/мд/
Фото: Царинска управа