Дамаск, 29 ноември 2024 (МИА) - Жестоките судири и гранатирање продолжија и денеска меѓу бунтовничките борци и сириските владини сили во северозападниот дел на земјата, при што 14.000 луѓе беа принудени да ги напуштат своите домови, соопштија активистите и ОН.

Борбите кои започнаа пред два дена продолжуваат околу областа Идлиб и во западниот дел од регионот на Алепо.

Активистите во Идлиб изјавија за ДПА дека денеска борбите се многу интензивни околу градот Саракиб во источниот дел на провинцијата Идлиб.

„Ова е клучен град бидејќи (бунтовниците) доколку го контролираат, тие можат да го контролираат автопатот Алеп-Дамаск“, велат активистите.

Сириските државни медиуми и Сириската опсерваторија за човекови права соопштија дека најмалку четворица студенти биле убиени, а двајца се ранети кога бунтовниците гранатирале област во која се сместени студенти во Алепо, што бунтовничките сили го негираа.

Сириската армија, поддржана од руските сојузници, возврати со повеќе од 60 тешки воздушни напади врз позициите на бунтовниците во Идлиб и областа Алепо од средата наутро.

Рами Абдел Рахман, шеф на опсерваторијата, рече дека бројот на загинати од средата достигна 242, вклучувајќи 24 цивили.

Опозициските фракции во средата најавија офанзива наречена Одвраќање на агресијата и тврдат дека тоа е одговор на неодамнешното артилериско гранатирање од страна на владините сили лојални на претседателот Башар ал-Асад врз цивилни цели.

Ситуацијата се влошува и особено го погодува цивилното население, предупреди Дејвид Карден, заменик регионален координатор на ОН за хуманитарна помош во Сирија.

- Повеќе од 14.000 луѓе се раселени во изминатите три дена, рече Карден. паг/

Фото: Икс