ЕУ го вклучи и Дмитриј Песков во санкциите против Русија
- Портпаролот на Кремљ, Дмитриј Песков е еден од 26-те истакнати личности на кои Европската унија им воведе санкции поради руската инвазија врз Украина, се наведува во одлуката објавена во служ
![ЕУ го вклучи и Дмитриј Песков во санкциите против Русија](https://mia.mk/index.php/images/20221112134443_big_730x400_6.webp )
Брисел, 28 февруари 2022 (МИА) - Портпаролот на Кремљ, Дмитриј Песков е еден од 26-те истакнати личности на кои Европската унија им воведе санкции поради руската инвазија врз Украина, се наведува во одлуката објавена во службениот весник на Унијата.
На списокот се наоѓаат олигарси и бизнисмени кои работат во нафтениот, банкарскиот и финансискиот сектор, но и членови на руската Влада, високи воени лица и „пропагандисти кои придонеле за ширење на антиукраинската пропаганда“, се вели во соопштението на ЕУ.
Меѓу санкционираните се Игор Сечин, директор на руската државна нафтена компанија Роснефт, и извршниот директор на енергетскиот гигант Транснефт, Николај Токарев.
Олигарсите Алишер Усманов, Пјотр Авен, Александар Пономаренко и банкарот Михаил Фридман, исто така, се наоѓаат на списокот.
Санкции се воведени и против рускиот вицепремиер Дмитриј Чернишенко, други членови на руската влада и истакнати новинари.
Санкциите вклучуваат забрана за патување и замрзнување на имот или забрана за пристап до имот.
На „црната листа“ се најде и осигурителната компанија СОГАЗ. гт/