Ескобар: САД се силен партнер за поддршка на Северна Македонија за брзо пристапување во ЕУ
- САД ќе ги поддржуваaт Северна Македонија и Албанија во нивните напори за реформи со цел процесот на евроинтеграција, што тие го започнаа, да се движи брзо, изјави денеска Габриел Ескобар, зам
![Ескобар: САД се силен партнер за поддршка на Северна Македонија за брзо пристапување во ЕУ](https://mia.mk/index.php/images/20230317102828_big_730x400_8.webp )
Вашингтон, 5 август 2022 (МИА) - САД ќе ги поддржуваaт Северна Македонија и Албанија во нивните напори за реформи со цел процесот на евроинтеграција, што тие го започнаа, да се движи брзо, изјави денеска Габриел Ескобар, заменик-помошникот на државниот секретар на САД, задолжен за Европа и Евроазија, јави дописникот на МИА од Вашингтон.
На денешниот брифинг посветен на ситуацијата во Западен Балкан, одговарајќи на новинарски прашања Ескобар укажа дека Северна Македонија е голем билатерален партнер и извонреден сојузник во НАТО.
Тој повторно ја истакна пораката од Стратешкиот дијалог, кој САД го имаа со Северна Македонија во јуни во Вашингтон.
-Нашата позиција од искуството со Северна Македонија е дека таа е одличен партнер, лојален пријател и силен поддржувач на трансатлантската заедница. Северна Македонија заслужено го започна движењето во нивниот процес кон Европа. Тие направија тешки реформи и продолжуваат да прават тешки реформи, изјави тој.
Укажа дека за САД, прашањето за јазикот и културниот идентитет на Северна Македонија не е прашање, и ја повика земјата да продолжи со конструктивниот дијалог со соседите и да се движи што побргу во процесот за пристапување.
-САД остануваат силен партнер во охрабрување и поддршка на Северна Македонија во тој процес. И конечно, земјата сигурно ќе биде успешна во тој процес, рече Ескобар.
Тој на брифингот говорејќи за историската, културната и економската припадност на Македонците, ја употреби кованицата „Северномакедонци“. -Северномакедонците се Европејци, тие историски се Европејци, културолошки се Европејци и економски Северна Македонија е дел од Европа и е важен и ќе биде важен учесник во делот на транспортот ИТ секторот, па се до енергетскиот сектор, рече Ескобар. кб/ац/