Кишињев, 27 октомври 2022 (МИА) -  Енергетските ресурси се користат како оружје против нашата земја и нашата млада демократија. Ова го изјави молдавската претседателка Маја Санду по средбата со шефот на бугарската држава Румен Радев, одржана во претседателската палата во Кишињев. Санду истакна дека земјата е во енергетска криза, која е најлоша од независноста на земјата. Таа го поздрави договорот склучен претходно денеска за пристап и транспорт на природен гас преку гасопреносниот систем на „Булгартрансгаз“, под кој потпишаа шефовите на операторите за пренос на гас од двете земји. - Со ова ќе можеме да ги диверзифицираме нашите извори на природен гас. Ќе можеме да ја поврземе националната мрежа за пренос на гас со другите системи од Централна и Југоисточна Европа, рече Санду. Единството на ниво на секоја земја, но и на целиот европски континент, денес е многу важно за да се одговори одлучно на руската војна против Украина, додаде молдавската претседателка. Таа посочи дека Молдавија го поддржува територијалниот интегритет на Украина и не ја признава анексијата на нејзините територии, нарекувајќи ја нелегална. ссм/