Вашингтон, 21 април 2026 (МИА) – Двајца тинејџери се убиени, а петмина ранети откако планирана тепачка меѓу млади прераснала во престрелка во парк во државата Северна Каролина, соопштија локалните власти.

Капетанот на полицијата во Винстон-Салем, Кевин Барнс, изјави дека двајца млади на возраст од 16 и 17 години починале откако биле смртно застрелани околу 10:00 часот по локално време во паркот „Лејнбач“ во близина на локално училиште. Други петмина на возраст меѓу 14 и 19 години биле ранети во престрелката, истакна полицискиот службеник за време на прес-конференција. Четири од повредените се девојчиња, соопштија властите.

Според податоците на полицијата, пукале неколку лица, вклучително и некои од ранетите. Засега нема приведени, а истрагата продолжува. јт/аб/

Фото: Пиксабеј илустрација