Њујорк, 31 октомври 2024 (МИА) - Генералното собрание на ОН изгласа резолуција со која се осудува економското ембарго на САД против Куба 32-ра година по ред. Резолуцијата беше усвоена со 187 гласа „за“ и два „против“. Против гласаа само Израел и САД. Една земја беше воздржана.

Пред гласањето, кубанскиот министер за надворешни работи Бруно Родригез ја критикуваше американската влада за нејзината политика на максимален притисок со цел да ја лиши карипската земја од увозот на гориво, што предизвика огромни прекини на струја низ целата земја на почетокот на месецот, вклучително и кога помина ураганот Оскар.

Родригез изрази надеж дека работите ќе се сменат по изборите во САД. „Претседателот Бајден вели дека таквата политика кон Куба има за цел да му помогне и да го поддржи кубанскиот народ. Кој ќе верува во таквото тврдење“, изјави кубанскиот министер за надворешни работи.

Резолуциите на Генералното собрание на ОН не се обврзувачки, но го одразуваат мислењето на светската заедница.

Ембаргото беше воведено во 1960 година по револуцијата предводена од Фидел Кастро и национализацијата на имотот во Куба што им припаѓа на американските граѓани и корпорации.

Заменик-амбасадорот на САД во Обединетите нации Пол Фолмсби изјави на Генералното собрание дека Соединетите Американски Држави силно го поддржуваат стремежот на кубанскиот народ за иднина која ги почитува човековите права и основните слободи. „Санкциите се еден елемент од нашите пошироки напори за унапредување на демократијата и промовирање на почитувањето на човековите права и основните слободи во Куба“, рече тој.

Фолмсби истакна дека околу 1.000 политички затвореници се неправедно притворени во Куба, повеќе од кој било момент во поновата историја на Куба. Фолмсби рече дека американските санкции ги ослободуваат храната, лековите и другите основни добра и дека САД извезле земјоделски производи во Куба во вредност од речиси 336 милиони долари минатата година и одобриле дополнителен хуманитарен извоз во островската држава. паг/

Фото: МИА архива