Кочани, 1 февруари 2022 (МИА) – Гимнастичарот Ристе Симеонов, член на КГС „Кочани“ го доби признанието за најдобар спортист на Кочани за 2021 година на традиционалниот избор што го организираше локалната самоуправа. На манифестацијата, што се одржа по едногодишна пауза поради ковид пандемијата, им беа доделени признанијата на најуспешните поединци и спортски екипи во општината. Во категоријата спортска личност наградата, со акламација, постхумно му припадна на кошаркарот и тренер Сашо Лазарев – Чапо, за особен придонес во развојот на кошарката. Наградата за најдобар тренер му припадна на Александар Андов од ГФК „Осогово“, а џудо клубот „Гладијатор 2016“ беше прогласен за најдобра спортска екипа. Годинава комисијата одлучи сите 13 предложени кандидати во категоријата Млад надежен спортист на Кочани, без рангирање, да добијат признанија како поттик за натамошни успеси во спортските дисциплини во кои се натпреваруваат. та/аа/