Струмица, 6 декември 2023 (МИА) - Во просториите на „Младинскиот центар“ во Струмица денеска е отворена првата промотивна работилница насловена „Кон побезбедна инклузивна заедница за децата преку почитување на правото на детето“. Работилницата е во организација на невладината „Двоја надеж“, финансирана од Институтот за европска политика „ЕПИ- Скопје“, како дел од проектот „Заедничка акција за човекови права“.

Работилницата ја отвори градоначачлникот Костадин Костадинов, кој истакна дека овој проект преку оваа работилница почнува да се реализира од Струмица.

- Кога во прашање се правата на децата и воопшто човековите права, ние сме должни, секој од позицијата која ја има во заедницата и општеството, да го дадеме нашиот максимален влог за нивно почитување и унапредување, а сето тоа да го правиме во сооднос со националните, европските и светските права и конвенции. Токму затоа, вакви и слични проекти кои во центарот на своето внимание ги имаат децата, заслужуваат безрезервна поддршка, рече струмичкиот градоначалник.

Проектот ќе се реализира во наредните осум месеци преку четири фази, а главна цел е подигање на свеста и капацитетите на децата и на креаторите на јавни политики за поголема инклузивност и безбедност на децата во локалната заедница преку унапредување на почитувањето на правата на децата.

На денешната работилница присуствуваа претставници од стручните служби, наставници и професори од средните и основните училишта, претставници на Локалниот совет за превенција, претставници од СВР Струмица, јавното здравство, невладиниот сектор, родители и ученици. рт/дма/

Фото: Општина Струмица