Кавадарци, 31 јули 2024 (МИА) – „Мост на желбите под самовилски води“ е именуван проектот што се реализира во кавадаречкото село Конопиште. Александра Димевска - Јокиќ, иницијатор за овој проект, појаснува за МИА дека неговата цел е промоција на природните убавини и чистиот воздух во селото, оддалечено четириесетина километри од Кавадарци. 

-Селото има идеални услови за развој на селскиот туризам. Дел од таа туристичка приказна ќе бидат кажувањата што се пренесуваат од колено на колено за самовилските води, но и мостот на желбите на самиот влез во селото, каде, секој што сака, може да си остави катанец, верувајќи дека на тој начин ќе ја заклучи својата љубов кон љубеното лице, за да трае, или да остави марамче во знак на таа љубов, откри таа. 

Притоа истакна дека во активностите се вклучени сите оние на кои селото нешто им значи, тука се постојано или повремено. 

За таканаречените самовилски води се верува дека се лековити и се раскажува дека никогаш не пресушиле. 

-Секој што сака, може да си замисли желба и да фрли метална паричка во водата, нагласува Димевска - Јокиќ, додавајќи дека целиот овој простор ќе биде уреден во парк. 

Своевремено, во оваа селска средина беше седиштето на тогашната Општина Конопиште, во која влегуваа неколку села. 

Во селото сега има малкумина постојани жители, луѓе редовно доаѓаат за викенди и празници. Тука е  фабриката за вода „Горска“, но и Центарот за одвикнување од зависности од дрога и алкохол „Нарконон Балкан“, што постои 20 години и во природна средина и без лекови, од зависност се ослободуваат лица од земјава и странство. Во Конопиште има и рибник, камен околу кој од многу одамна се вртеле луѓе, верувајќи дека тоа ќе им донесе среќа, како и убавици од камен, камени кукли дело на мајката природа, што чекаат да бидат видени. свд/вј/

Фото : Александра Димевска - Јокиќ