Велес,31 март 2025(МИА) - Во водите на реката Вардар во Градскиот парк во Велес на 6 април ќе се одржи 2. коло од Европскиот куп во кајак на диви води – дисциплина спуст. 

Овој врвен натпревар ќе донесе 200 елитни кајакари од 10 земји, кои ќе се натпреваруваат во шест дисциплини, поделени во јуниорска и сениорска категорија. 

На овој престижен спортски собир ќе учествуваат претставници од Словенија, Хрватска, Босна и Херцеговина, Србија, Косово, Албанија, Грција, Турција, Бугарија и домаќинот Македонија.

- Велес и Македонија повторно ќе имаат можност да ги покажат своите организациски капацитети, продолжувајќи ја успешната низа на меѓународни натпревари, по двете Балкански првенства и два Светски купа организирани во изминатите две години изјави за МИА Љубомир Спасиќ од Кајак Кану Клубот „Арка-Борец“ од Велес кој е организатор на овој елитен спортски настан.

Тој потенцира дека  највозбудливиот момент од натпреварот ќе биде финалната рунда со најдобрите 15 во јуниорска и сениорска конкуренција, кои ќе се борат за престижот и титулата победник.

ККК „Арка - Борец“ и Општина Велес  ги повикуваат  сите љубители на спортот, адреналинот и природата да дојдат во Градскиот парк в недела во Велес и и да бидат дел од овој спортски  спектакл и да ги бодрат кајакарите учесници.

Трките ќе се одвиваат на реката Вардар, во Градскиот парк со почеток во 9:30 часот. ад/зс/

Фото. МИА