Њујорк, 12 декември 2023 (МИА) - Генералното собрание на ОН денеска треба да гласа за итен прекин на огнот во Појасот Газа, неколку дена откако САД ставија вето на слична резолуција предложена во Советот за безбедност.

Овој предлог го поднесоа група од 20 арапски земји и Организацијата за исламска соработка, јавува Би-Би-Си.

Седницата на Генералното собрание на ОН е закажана за 15:00 часот по локално време, односно 21:00 часот по средноевропско време.

САД во петокот ја блокираа резолуцијата во Советот за безбедност на ОН, која дојде откако генералниот секретар на ОН Антонио Гутереш свика итна седница според ретко користениот член 99 од Повелбата на ОН за да го привлече вниманието на Советот за безбедност на „секое прашање што може да го загрози меѓународниот мир и безбедност“.

Ниту една земја нема право на вето во Генералното собрание од 193 члена.

За разлика од Советот за безбедност, резолуциите на Генералното собрание не се правно обврзувачки, иако го одразуваат глобалното мислење.

Од почетокот на војната, Советот за безбедност шест пати не успеа да усвои резолуција со која се бара прекин на огнот во Газа поради несогласувањата меѓу неговите 15 членки. ссм/

фото: архива