Будимпешта, 9 јули 2025 (МИА) - Унгарскиот орган за одговор при катастрофи добил информации за вкупно 9.752 инциденти поврзани со бура низ целата земја до 6 часот наутро, објавија унгарските медиуми.

Пожарникарските екипи одговориле на 5.008 повици и ја ставиле ситуацијата под контрола. Противпожарната служба испратила 502 пожарникари на местото на настанот, поддржани од 310 доброволни противпожарни и спасувачки организации, вкупно 72 структури и 74 претставници на локалната самоуправа.

Противпожарната служба на округот Хајду-Бихар е во состојба на готовност од утрото и има дополнителни 50 пожарникари како засилување. Окрузите Чонград, Хајду-Бихар, Пешта и Саболч-Сатмар-Берг, исто така, добиле засилување од помалку погодените региони.

До утрово, бројот на домаќинства без електрична енергија се намалил на 21.765.

Како резултат на вчерашните бури, 16 населени места во округот Хајду-Бихар останаа без вода поради оштетени далноводи, но услугата беше обновена навечер.

Според прогнозата на Националната метеоролошка служба, денеска се очекуваат повеќе дождови и бури во близина на североисточната граница, како и силни североисточни ветрови во северозападна и централна Унгарија. мс/

фото: МИА архива