Гостивар, 3 октомври 2025 (МИА) – Независниот кандидат за градоначалник на Општина Гостивар, Висар Адеми, во просториите на I-Can Гостивар, пред граѓани, активисти ја презентираше Изборната програма 2025 – 2029, за кој како што рече, е документ кој има за цел да ги постави темелите за развој и модернизација на градот.

Адеми за програмата напомна дека има три главни приоритети: Чистење од корупција, а тоа би значело отстранување на партиски директори и поставување професионалци; вработените во општината и јавните претпријатија ќе поминат тримесечен пробен период. Втор приоритет на Адеми е чистење на отпадот со динамика: седум дена за градот и населените места, а за седум недели дивите депонии и справување со појавата на бездомни кучиња.

- Оваа програма не е ливче со празни ветувања, туку конкретен план за работа. Секој проект што го предложив е остварлив и измерлив. Ова е мојот отворен договор со граѓаните на Гостивар, рече независниот кандидат за градоначалник на вечерната презентација.

Како главни столбови на програмата ги наведе и добро управување со редовно јавно известување за буџетот, трошоците и општинските проекти, модернизирање на инфраструктура и одржливо управување со отпадот. За предизвиците со кои се соочува градот, Адеми потенцира:

- Гостивар не може повеќе да се движи со старото темпо. Треба да прифатиме нови начини на водење политика и управување, каде граѓанинот секогаш е во центарот. Иднината на Гостивар е во младите. Ако не создадеме можности за нив овде, ќе ја изгубиме енергијата и креативноста што ни се најпотребни. Мојата програма има за цел да создаде услови младите да не гледаат емиграција како единствена алтернатива, рече Адеми.

Висар Адеми е економист и универзитетски профосер и е единствен од четворицата зад чија кандидатура нема политичка партија.згм/

фото: изборен штаб на Висар Адеми