Бајден разговарал со емирот на Катар за ослободувањето на заложниците од Појасот Газа
- Американскиот претседател Џозеф Бајден и емирот на Катар, шеикот Тамим бин Хамад ал-Тани, денеска телефонски разговараа за итната потреба Хамас „без одлагање“ да ги ослободи заложниците земени за време на нападот врз Израел на 7 октомври, соопшти Белата куќа.
![Бајден разговарал со емирот на Катар за ослободувањето на заложниците од Појасот Газа](https://mia.mk/index.php/images/20231117215141_big_730x400_85.webp )
Вашингтон, 17 ноември 2023 (МИА) – Американскиот претседател Џозеф Бајден и емирот на Катар, шеикот Тамим бин Хамад ал-Тани, денеска телефонски разговараа за итната потреба Хамас „без одлагање“ да ги ослободи заложниците земени за време на нападот врз Израел на 7 октомври, соопшти Белата куќа.
Двајцата лидери разговараа и за „постојаните напори за зголемување на испораката на многу потребната хуманитарна помош во Газа“, се додава во соопштението.
На првиот ден од нападот на палестинските екстремисти од југот на Израел, околу 240 заложници беа однесени во Појасот Газа.
Синоќа, за време на состанокот на воениот кабинет, израелскиот премиер Бенјамин Нетанјаху му телефонираше на претседателот Бајден и апелираше до него да изврши притисок врз катарскиот емир да го зголеми бројот на заложници кои ќе бидат вклучени во договорот меѓу Хамас и израелската страна за кој посредува Катар, јавија израелските медиуми. јт/
Фото: МИА архива