Бајден и оддаде почит на кралицата Елизабета пред погребот
- Американскиот претседател Џо Бајден денеска и оддаде почит на британската кралица Елизабета Втора, еден ден пред нејзиниот државен погреб, појавувајќи се на балконот на Вестминстерската сала
![Бајден и оддаде почит на кралицата Елизабета пред погребот](https://mia.mk/index.php/images/20221113223116_big_730x400_30.webp )
Лондон, 18 септември 2022 (МИА) - Американскиот претседател Џо Бајден денеска и оддаде почит на британската кралица Елизабета Втора, еден ден пред нејзиниот државен погреб, појавувајќи се на балконот на Вестминстерската сала додека редица луѓе поминуваа покрај нејзиниот ковчег.
Бајден е еден од многуте државници и членови на кралски семејства од цела Европа, Азија, Африка и Америка кои ќе присуствуваат на погребот во понеделник.
Стотици илјади луѓе се собраа во Лондон за да и оддадат почит на британската кралица Елизабета Втора, која почина на 8 септември на 96-годишна возраст.
Американскиот претседател подоцна ќе му се придружи на британскиот крал Чарлс Трети и други светски лидери на приемот пред погребот.
„Нејзиното наследство ќе биде напишано со големи букви на страниците на британската историја и во приказната за нашиот свет“, истакна Бајден во пораката со сочувство по повод смртта на кралицата Елизабета.
Бајден беше еден од 14-те американски претседатели за време на 70-годишното владеење на британската кралица Елизабета. паг/