Париз, 6 мај 2025 (МИА) – Францускиот министер за надворешни работи Жан-Ноел Баро денеска го осуди израелскиот план за нова офанзива врз Појасот Газа, обвинувајќи ја владата на израелскиот премиер Бенјамин Нетанјаху за кршење на меѓународното право.

Баро „строго го осуди“ Израел поради планирањето „напад од големи размери“ и „раселување на поголемиот дел од населението“ во палестинската енклава, пренесува Фигаро.

- Ова не е прифатливо. Итно е потребен прекин на огнот, непречен пристап до масовна хуманитарна помош и ослободување на заложниците што ги држи Хамас, рече Баро.

Тој додаде дека е свесен дека терористичкиот напад на Хамас врз Израел на 7 октомври 2023 година оставил „многу длабоки трауми“, но нагласи дека Израел со овие планови „јасно го крши меѓународното право“.

Шефот на француската дипломатија исто така го повика Израел да не напаѓа цивили и хуманитарни работници.

Безбедносниот кабинет на Нетанјаху вчера одобри постепено проширување на офанзивата против Хамас во Појасот Газа, додека израелскиот премиер предупреди дека таа офанзива ќе биде „интензивна“. јт/

Фото: Баро на Х