Анкара, 25 декември 2024 (МИА) - Турските воени сили убиле 21 курдски борец во Северна Сирија и Ирак, соопшти денеска турското Министерство за одбрана.

Во соопштението се наведува дека во Северна Сирија биле убиени 20 борци на Курдската работничка партија (ПКК) и на сириските Курди од „Сили за заштита на народот“ (YPG), кои се подготвувале да извршат напад.

„Нашите операции ќе продолжат ефективно и решително,“ се додава во изјавата.

ПКК, која Турција, Европската Унија и САД ја сметаат за терористичка организација, го започна својот вооружен бунт против турската држава во 1984 година, при што во конфликтот загинаа над 40.000 лица.

Турција ја смета YPG за продолжение на ПКК и ја класифицира како терористичка група. По падот на сирискиот претседател Башар ал-Асад овој месец, Анкара повторно побара распуштање на YPG, наведувајќи дека за групата нема место во иднината на Сирија.

Турција редовно спроведува воздушни напади и воени операции преку границата насочени кон ПКК, која има бази во планинските области на Северен Ирак. ссм/

фото: архива